Lectori benevolo
collegivm compositorvm commentarii a Sileno nvncvpati
anno L post primvm fascicvlvm in lvcem editvm
salvtem
Magnopere laetantes nos, huius commentarii compositorum collegium, quinquagesimum ab ipsius die natali confectum annum concelebramus. Eius ortus meritum, anno MCMLXXV, ad auctoritatem ad scribendum praeclari illius magistri Quintini doctoris Cataudella – in quem numquam satis gratitudinis tribui possit – qui, paucis adiuvantibus sodalibus et discipulis, novam antiquitatis vocem, procul ab academicis institutis (nec non nummariis subsidiis!), edere voluit, praecipue curans ut Christianae litterae singulari spatio fruerentur.
Ad inscriptonem inveniendam, de mythologia lepidisque Vergilianis versibus mentionem facere visum est. Itaque commentarii “Sileno” inscribuntur, senem illum memorantes qui, ebrius et som no iacens, a duobus versutis adulescentibus vinctus et coactus, tandem canere assentit dicens:
Carmina quae vultis cognoscite; carmina vobis,
huic aliud mercedis erit.
(Verg. ecl. 6, 25-26)
* * *
Incepti primordia propter onerosos sumptus et opum exiguitatem haud expedita fuere. Typographicum illis annis munus a parva humilique sed peraudaci officina (SETIM ei nomen) conficiebatur, erga quam gratias enuntiare nunc aequum putamus. Postea complures supervenerunt vicissitudines, tam graves postulantes difficultates ut negotiorum remissionis saepe impendens periculum esset, vixque ingentibus profusis conatibus id vitaretur.
Denique foedus cum “Agorà” typothetica societate factum est, quod “Sileno” servavit eique sine ullo metu operam persequi sinit. Praeteritis igitur quinquaginta annis, renovato cum vigore ad humanitatis antiquarumque litterarum utilitatem opus pergendum est.
Datum mense Iulio MMXXIV
Casimirus Nicolosi dictavit
Iohannes Salanitro
Paulus Blasius Cipolla